Израилдик аскерлер Ливандын түштүгүндө 22 кишини өлтүрүштү

Ливандын Саламаттыкты сактоо министрлиги Израилдин аскерлери өлкөнүн түштүгүндө кечээ, 26-январда 22 кишини өлтүргөнүн билдирди. Бул тууралуу чет элдик басылмалар жазышты.

Маалыматка караганда, израилдик аскерлер 26-январда келишимдин мөөнөтү аяктаганда Ливандын түштүгүндө үйлөрүнө кайтууга аракет кылган жайкын тургундарга ок чыгарган. Дагы 124 киши жарадар болгон. Өлгөндөрдүн арасында Ливан армиясынын бир жоокери бар.

АКШ президентинин администрациясы 26-январда Израил менен Ливандын ортосундагы ок атышпоо келишими 18-февралга чейин узартыларын жарыялады. Билдирүүдө белгиленгендей, Ливандын, Израилдин жана АКШнын бийликтери "2023-жылдын 7-октябрынан кийин туткунга алынган ливандык туткундарды кайтаруу боюнча" сүйлөшүүлөрдү баштоону пландап жатышат.

2024-жылдын ноябрынын аягында жетишилген ок атышууну токтотуу келишимине ылайык, Израил 26-январга чейин Ливандын түштүгүнөн аскерлерин чыгарып кетмек. Бул мөөнөт бүтөрүнө эки күн калганда, 24-январда Израилдин бийлиги АКШдан аскерлерин Ливандын түштүгүнөн чыгарып кетүүнү 30 күнгө кечиктирүүнү суранган.

Ливандагы "Хезболла" тобу менен Израилдин ортосундагы кагылышуу 2023-жылдын 7-октябрында Израил Газа тилкесине басып киргендеги согушка параллелдүү уланууда. "Хезболла" 2023-жылдын 8-октябрында ХАМАСка тилектешик кылып, Израилди аткылай баштаган жана Израилдин күчтөрү ага жооп иретинде ливандык топ менен байланышы бар буталарга сокку урган.