Ысык-Ата курортуна бараткан жолдо унаа жардан кулап, 2 адам каза тапты

Ысык-Ата районунда жол кырсыгы катталып, 2 адам каза болду. Бул тууралуу бүгүн, 14-февралда Чүй облустук жол кыймылынын коопсуздугун камсыздоо башкармалыгынан билдирди.

Маалыматка ылайык, кырсык 22-январда саат 18:30 чамасында болгон. Анда 3 адам Toyota Prado үлгүсүндөгү унаасы менен Тогуз-Булак-Ысык-Ата курорту унаа жолу аркылуу батыштан чыгышты көздөй бара жатышып, 54 жаштагы айдоочусу рулга ээ боло албай жолдон чыгып кетишкен. Натыйжада унаа жардан кулап, айдоочу менен 50-55 жаштагы аял киши көз жумган.

Ал эми дагы бир 51 жаштагы жүргүнчү Кант шаарынын ооруканасынын жандандыруу бөлүмүнө жаткырылганын башкармалыктан белгиледи.