14-февраль сүйүү күнүнөн башка дагы бир белгилүү дата экенин билчү белеңиз?

Бүгүн, 14-февраль – белекке китеп берүүнүн эл аралык күнү. Бул күнү китеп сүйүүчүлөр бири-бирине китеп белек кылышат. Ал эми бул майрам качан жана кантип белгиленип калган?

Бул күндүн идеясы мектеп китепканачысы, блогер, балдар китептери сайтынын негиздөөчүсү, үч баланын энеси, америкалык Эмми Бродмурга таандык. Тагыраак айтканда, анын кичинекей уулу апасынан «Эмне үчүн адамдар бири-бирине китеп берген өзгөчө күн жок?» деп сураган. Мындан улам 2012-жылдын дал ушул күнү апасы уулунун кыялын орундатуу үчүн социалдык тармактагы досторун бул өнөктүккө катышууга чакырык таштаган кайрылуу жарыялаган.

"Азыр адамдар бири-бирине китептерди жөн эле белек кылбастан, алар өздөрүнүн окуяларын, сүрөттөрүн Твиттер, Фейсбук жана Эл аралык китеп берүү күнүнүн веб-сайтына бөлүшөт. Бул долбоор бардык адамды шыктандырат", - деп жазган Эмми Бродмур өзүнүн социалдык баракчасына.

Ошол күндөн тартып китеп сүйүүчүлөр бул күндү китеп белекке берүү күнү деп белгилеп келишет.

Ошондой эле 14-февраль Ыйык Валентин күнү катары дагы белгиленет.

Кош майрамга туура келген бул күндө сиз кайсы майрамды белгилейсиз?