Орусияда мигранттарга батирин ижарага бергендер каттоого тургузбаса айыпка жыгылат

Орусияда батирди ижарага алган чет элдиктерди жашаган жери боюнча каттоодон баш тарткан турак жай ээлерине 4 миң рублга чейин айып салынат. Бул туурасында орус басылмалары жазышты.

“Чет элдик жаранды каттоо батирдин ээсинин жоопкерчилигинде. Эгерде менчик ээси турак жайды ижарага берип, бирок жашаган жери боюнча каттоодон баш тартса, бул административдик укук бузуу болуп саналат жана ээсине 4 миң рублга чейин айып пул салууга алып келет”, — деп билдирген Орусиянын Ички иштер министрлигинин Миграция маселелери боюнча башкы башкармалыгынан.

Бөлүм турак-жай ээси каалаган убакта чет элдик жаранды каттоодон чыгара алаарын тастыктап, мигрантты каттоо үй ээсинен кошумча чыгымдарды талап кылбай турганын жана Мамлекеттик кызматтар аркылуу ишке ашырылса болорун эскертти.

Айта кетсек, 2024-жылы сот аткаруучулар өлкөдө мыйзамсыз жүргөн рекорддук сандагы - дээрлик 90 миң чет элдикти Орусиядан чыгарышкан.