АКШ менен Орусиянын өкүлдөрү Эр-Риядда эмнелерди сүйлөштү?

АКШнын мамлекеттик катчысы Марко Рубио орусиялык кесиптештери менен Эр-Риядда жолуккандан кийин Вашингтон Украинадагы согушту “адилеттүү” жана “туруктуу” чечүү жолун издеп жатканын билдирди.

Сауд Арабияда Орусиянын тышкы иштер министри Сергей Лавров менен болгон жолугушуусунун жыйынтыгын журналисттерге комментарийлеген Рубио, "Максат бул жаңжалды адилеттүү, туруктуу жана бардык катышуучулар үчүн пайдалуу түрдө токтотуу" деди.

Рубио Европа өлкөлөрү согушту токтотуу үчүн сүйлөшүүлөргө тартылышы керектигин жана Орусия менен өнөктөштүк үчүн өзгөчө мүмкүнчүлүктөр бар экенин кайталады. Ал Москва согушту токтотуу үчүн “олуттуу процесске” катышууга даяр экенине ынанарын кошумчалады.

Сүйлөшүүлөр пайдалуу болгонун, орусиялык жана америкалык делегациялар бири-бирин угуп, эки өлкөнүн кызматташтыгын толук калыбына келтирүү үчүн шарттарды түзүүнү макулдашканын Орусиянын тышкы иштер министри Сергей Лавров билдирди.

Ошол эле маалда ал Украинанын НАТОго мүчөлүгүн, ошондой эле НАТОго мүчө өлкөлөрдүн аскерлеринин ал жерде башка желектин астында аракеттенсе дагы, кабыл алынгыс экенин кайталады.

"Бүгүн биз кесиптештерибизге президент Владимир Путин бир нече жолу баса белгилеген нерсени түшүндүрдүк: НАТОнун кеңейиши, Украинанын Түндүк Атлантикалык альянс тарабынан сиңирилиши Орусия Федерациясынын кызыкчылыктарына, биздин эгемендүүлүгүбүзгө түздөн-түз коркунуч жаратат", - деди Лавров.

Тараптар ошондой эле өз ара геосаясий кызыкчылыкты туудурган маселелер боюнча, ошондой эле Украинадагы жаңжалды ийгиликтүү чечүүдөн пайда боло турган тарыхый экономикалык жана инвестициялык мүмкүнчүлүктөр боюнча келечектеги кызматташтыктын пайдубалын түзүүнү макулдашты.

Түркияда иш сапары менен жүргөн Украинанын президенти Владимир Зеленский эртең Сауд Арабияга сапары токтотуларын жарыялады. Ал белгилегендей, Украина боюнча сүйлөшүүлөр анын катышуусу менен гана жүргүзүлүшү керек.