Кыргызстан Африка өлкөсүнө элчилик ачат

Президент Садыр Жапаров Кыргызстандын Эфиопиядагы элчилигин ачуу боюнча жарлыкка кол койду. Бул тууралуу президенттин администрациясынан кабарлашты.

Андагы билдирүүгө ылайык, элчилик Эфиопиянын борбору Аддис-Абеба шаарына ачылат.

"Президент Садыр Жапаров кол койгон жарлыкка ылайык, Кыргыз Республикасынын Эфиопия менен саясий, соода-экономикалык, илимий-техникалык жана маданий байланыштарын андан ары өнүктүрүүнү камсыз кылуу максатында, “Кыргыз Республикасынын дипломатиялык кызматы жөнүндө” мыйзамдын 5-беренесинин 2-бөлүгүнө, “Мамлекеттик органдардын Кыргыз Республикасынын тышкы саясат чөйрөсүндөгү өз ара аракеттенүүсү жөнүндө” мыйзамдын 4-беренесинин 10-пунктуна ылайык токтом кылынат:

1. Аддис-Абеба шаарында жайгаштыруу менен Кыргыз Республикасынын Эфиопия Федеративдик Демократиялык Республикасындагы элчилиги уюштурулсун;

2. Кыргыз Республикасынын Министрлер кабинети: – Кыргыз Республикасынын Эфиопия Федеративдик Демократиялык Республикасындагы элчилигинин ишин уюштуруу жана финансылык жактан камсыз кылуу маселелерин чечсин;

– Кыргыз Республикасынын Тышкы иштер министрлигинин штаттык санын 4 бирдикке көбөйтүү маселесин чечсин;

– өзүнүн чечимдерин ушул жарлыкка ылайык келтирсин", - деп жазылат анда.