Кадыры бийик, миң айдан да артык Кадыр түндү кантип өткөрүү керек? Муфтият жооп берет

Өлкөдө кадыр түн 26-марттан 27-мартка караган түнгө белгиленди. Бул түн өзүнүн өзгөчөлүгү – Орозо айынын акыркы так күндөрүнө жашырылганы, сырдуу кылынганы. Ислам дүйнөсүндө кадыр түндү Орозонун 26-күнүнөн 27-күнүнө караган түнү деп эсептешет.

SUPER.KG порталы кадыр түндүн артыкчылыктары, белгилери тууралуу суроолоруна Муфтияттан жооп алды.

"Кадыр" деген сөздүн чечмелениши

"Кадыр" (арабча: القدر) – "таңуулоо", "баа берүү", "бийик даража", "таң калычтуу күч-кубат" деген маанилерди билдирет. Исламда кадыр түн (Лайлатул-Кадр) ыйык түн болуп, бул күнү Аллах Таала тагдырларды белгилеп, пайгамбарларга даанышмандык берет деп айтылат.

Кадыр түндүн белгилери

Хадистерде жана уламалардын баяндарында кадыр түндүн белгилери төмөнкүчө сүрөттөлгөн:

• Түнү тынч, жылуу жана бейпил болот;
• Асманда адаттан тыш жарыктык байкалат;
• Шамал, бороон же катуу ысык болбойт;
• Таңкы намазга чейин өзгөчө тынчтык өкүм сүрөт;
• Таң атканда күндүн нуру жумшак, нурсуз көрүнөт.

Кадыр түндү кантип өткөрүү керек?

Кадыр түн – Аллахка жакындоо үчүн эң чоң мүмкүнчүлүк. Бул түнү төмөнкү ибадаттарга басым жасоо керек:

• Намаз окуу – көп нафил (кошумча) намаздарды аткаруу;
• Куран окуу жана тафаккур кылуу – айрыкча, кадыр сүрөсүн көп окуу;
• Зикр жана дуба кылуу – "Лаа илааха иллаллах", "Субханаллах", "Алхамдулиллах", "Аллаху Акбар" деген сөздөрдү көп айтуу;
• Пайгамбарга (САВ) салават айтуу;
• Тобо кылуу, кечирим суроо – "Аллахумма иннака афуун, тухиббул афва, фа’фу анни" деген дубаны көп кайталоо;
• Садака берүү – муктаждарга жардам берүү.

Кадыр түндө эмнелерге тыюу салынган?

• Бекер убакыт өткөрүү – оюн-зоок, куру сөз, телефонго алаксыбоо;
• Күнөө иштерге аралашуу – ушак айтуу, араздашуу, адепсиз иштерди жасоо;
• Аялдар үчүн жасанып, жыттуу майлар менен сыртка чыгуу – эгерде мечитке бара турган болсо, жөнөкөйлүктү сактоо зарыл.

Кыз-келиндер да мечиттерге барып жамаат менен кадыр түн тосконго болобу?

Кыз-келиндер кадыр түндү, намазды, зикирди үйлөрүндө аткаруусу жакшыраак. Эгерде ибадаттарды мечитте өткөрүүнү кааласа, анда мечиттин атайын аялдарга дайындалган шарттары болсо болот. Анда төмөнкү шарттарды эске алуу керек:

• Жөнөкөй кийим кийип, жасанып чыкпоо;
• Намаз, зикр менен алек болуп, бейпилдикти сактоо;
• Эгер ыңгайсыз шарт болсо, үйдө ибадат кылуу артыкчылыктуу.

Кандай ибадаттар аткарылат?

Кадыр түнүндө төмөнкү ибадаттарды аткаруу сунушталат:

• Тахажуд намазы (жашыруун түндө окулган нафил намаз);
• Куран окуу;
• Дуба кылуу – өзүң, үй-бүлөң жана жалпы үммөт үчүн;
• Садака берүү – бул күнү берилген сооп жүз эсе көбөйөт;
• Күнөөлөр үчүн тобо кылуу – жүрөктөн чыккан чын ыкластык менен.

Белгилей өтсөк, Кыргызстанда Орозо айт майрамы 30-мартта белгиленет. Орозо айы 1-мартта башталган болчу. Орозо айы кээде 30 же 29 күн болот.