"Жүр, ээрчишип кетели өрүкзарга". Баткендин "сакурасы" гүлүн ачты (видео)

Дүйнөгө өзүнүн өрүгү менен таанылган Баткенде өрүк гүлдөдү. Учурда өрүкзар аппак гүлүн ачып, айланага көрк берип, абаны керемет жыты менен ээлеп алган кези. Ажайып кооз көрүнүштү көрүү үчүн Баткенге барууну сунуштайбыз.

Баткендеги өрүк гүлүнүн кооздугун айрымдар Япониядагы сакура менен салыштырат. Япондор дүйнөгө сакуранын гүлдөшүн даңкташса, Баткен өрүкзардын ажайып гүлдөшүн сөз кылат.

Өрүкзар гүлүн апрелдин башында төгүп, мөмөсү июнь, июль айларында бышат. Сөз кылгандай эле өрүк Баткендин бренди жана да негизги киреше тармагы болуп саналат.

Баткен облусунда 10 миң гектардан ашык өрүкзар болсо, аймакта өрүктүн 20дан ашык сорту бар. Ошондой эле ар бир үйдүн короосунан эң аз дегенде 10-15 түп өрүк багын көрүүгө болот.