Кыргызстан Польшада жана Канадада өз өкүлчүлүгүн ачууну пландап жатат

Тышкы иштер министрлиги Польшада жана Канадада Кыргызстандын элчилигин же консулдук ачууну пландап жатат. Бул тууралуу ТИМ башчысынын орун басары Алмаз Имангазиев Жогорку Кеңештин Эл аралык иштер, коргоо, коопсуздук жана миграция боюнча комитетинин жыйынында билдирди.

"Министрликтин пландарында Канада менен Польшада Кыргызстандын элчилигин же башкы консулдугун ачуу боюнча максатыбыз бар. Кудай буюрса, жакынкы убакытта, 2025-жылдын аягы же 2026-жылдын башында ушул маселени ишке ашырганга аракет кылабыз", - деди Имангазиев.