Бишкекте көк майсанга унаа токтоткондорго катуу чаралар көрүлүүдө

Бишкекте муниципалдык инспеция көк майсанга (газон) унаа токтоткондорго чара көрүп, айып пул салууда. Бул туурасында бүгүн, 1-апрелде мэриядан кабарлашты.

Маалымдалгандай, жыл башынан бери 102 протокол түзүлүп, жалпы суммасы 664 миң 500 сомду түзгөн айып пул салынган. Фактылар күнүмдүк рейддердин жүрүшүндө жана тиешелүү жарандар тарабынан жөнөтүлгөн арыздар аркылуу аныкталууда.

"Жашыл аймактарга унаа токтотууга жол бербөө максатында ​​инспекторлор газондорду кызыл тасма менен курчаган. Мындан тышкары жашыл аймактарды «Бишкек жашыл курулуш» муниципалдык ишканасынын кызматкерлери калыбына келтирүүдө. Мындай аракеттерге карабастан, айдоочулар учурдагы мыйзамдарды бузуп келишет", - деп айтылат маалыматта.

Рейддер кайгуул кызматы менен биргеликте ишке ашып жаткандыгы кошумчаланган. Ал эми эреже бузган жеке жактарга 5,5 миң сом, юридикалык жактарга 17 миң сом айып пул каралган.