Мэрия Бишкекте калган троллейбустар эмне болорун айтты

Бишкекте калган 42 даана троллейбусту электробуска өткөрүп, каттамга чыгаруу пландалууда. Бул тууралуу бүгүн, 1-апрелдеги Жогорку Кеңештин Транспорт, коммуникациялар, архитектура жана курулуш боюнча комитетинин жыйынында Транспорт жана жол-транспорттук инфратүзүмдү өнүктүрүү департаментинин директору Улан Бейшенбаев билдирди.

Анын айтымына караганда, учурда пилоттук түрдө 1 троллейбус жасалып, 10 күндүн ичинде каттамга чыгат.

"Бишкек шаарынын мэриясына Ош менен Нарын шаарынын мэриясы кат түрүндө кайрылышкан. Ошол каттын жана шаардык кеңештин чечиминин негизинде Ош шаарына 100 троллейбус, Нарын шаарына 6 троллейбус бөлүп бергенбиз. Бизде 42 даана троллейбус калган, аларды учурда электробуска өткөрүүнү пландап жатабыз. Азыр пилоттук түрдө бирди жасап көрүп, 10 күндүн ичинде чыгарабыз. Бизге адистер айтышты, жасоого мүмкүн деп", - деди Бейшенбаев.

Белгилей кетсек, буга чейин Бишкек мэриясы борбор калаадагы бардык троллейбустарды каттамдан алып, ордуна электробустарды линияга чыгарган болчу.

Ал эми Бишкек шаарынын административдик соту Бишкек мэриясынын троллейбустук байланыш түйүндөрүн демонтаждоо боюнча аракеттерин мыйзамдуу деп тапкан.

Мэрия Бишкектен троллейбустардын байланыш түйүндөрүн демонтаждоо жана троллейбустарды өткөрүп берүү бир нече себептерден улам болгонун айткан.