Бишкекте акыркы үч айда канча автобус кырсыкка кабылганы айтылды

Ушул жылдын 1-январынан 31-мартына чейин «Бишкек шаардык транспорту» муниципалдык ишканасынын карамагындагы 158 автобус ар кандай жол кырсыктарына кабылды. Мындай маалыматты Мамлекеттик ипотекалык компания таратты.

Анда айтылгандай, 2024-жылдын ушул эле мезгилине караганда мындай кырсыктар 15 пайызга көбөйгөн.

Көзөмөл органдарынын маалыматына ылайык, автобус айдоочулар тарабынан жол эрежелеринин бузулушу да көбөйгөн.

"Кырдаалды туруктуу кылып, айдоочулардын маданиятын жогорулатуу максатында БГТ жетекчилиги, жол кыймылын көзөмөлдөө органдарынын өкүлдөрү жана Бишкек шаарындагы Мамлекеттик камсыздандыруу уюмунун филиалынын катышуусу менен атайын түшүндүрүү иш-чарасы уюштурулду.

Иш-чаранын жүрүшүндө катышуучуларга автотранспорт жана турак жайды камсыздандыруу тартиби тууралуу толук маалымат, жол кырсыктарын болтурбоо боюнча сунуштар, жол менен камсыздандыруу үчүн керектүү документтерди чогултуу боюнча түшүндүрмөлөр берилди", - деп айтылат анда.