Билим берүү министри: "Мектептер сентябрга чейин 2,5 миллион окуу китеби менен камсыздалат" 

Кыргызстандын мектептери 2025-жылдын 1-сентябрына чейин жалпы 2,5 миллион даана жаңы окуу китеби менен камсыздалат. Бул тууралуу Билим берүү жана илим министри Догдуркүл Кендирбаева бүгүн, 17-апрелде Жогорку Кеңештин жыйынында билдирди.

Анын айтымында, окуу китептерин даярдоого жана басып чыгарууга 740 миллион сом бөлүнгөн. Бул окуу куралдары негизинен STEM-багытындагы сабактарды камтыйт.

Төмөнкү сабактар боюнча китептер даярдалат:

• Англис тили - 3-, 4-, 5-, 6-, 7-, 8-, 9-класстар үчүн
• Табият таануу - 1-, 2-, 5-, 7-, 8-класстар үчүн
• Математика - 1-, 2- 5-, 7-, 8-класстар үчүн

Мындан тышкары, 1-, 2-, 5- жана 7-класстар үчүн орус тили жана адабияты боюнча окуу китептери да сатып алынат.

Министр белгилегендей, бул аракеттер билим берүүнүн сапатын жогорулатууга жана окуучуларды заманбап шартта билим менен камсыз кылууга багытталган.