Бишкекте миллион сомдон ашык уурулукка байланыштуу 33 жаштагы жаран кармалды

Бишкекте уурулукка шектелип 33 жаштагы жаран кармалды. Бул тууралуу бүгүн, 18-апрелде шаардык милициядан билдирди.

Маалыматка ылайык, былтыр 30-декабрда Ленин районунун милициясына 30 жаштагы жаран арыз менен кайрылган. Ал Чыңгыз Айтматов көчөсүндө жайгашкан үйүнөн акча каражаттарын жана алтын буюмдарын уурдатканын айткан. Келтирилген чыгымдын суммасы 1 миллион 454 миң сомду түзгөн.

Бул факты боюнча Кылмыш-жаза кодексинин 205-беренеси (Уурулук) менен кылмыш иши козголгон. Шектүү катары мурда да уурулук менен соттолгон жаран кармалып, убактылуу кармоочу жайга киргизилди. Учурда тергөө иштери уланууда.