Кадамжайда Спринтердин айдоочусу 17 жаштагы өспүрүмдү сүзүп, ал каза болду

Баткен облусунун Кадамжай районунда Mercedes Sprinter унаасынын айдоочусу жол жээгинде турган өспүрүмдү сүзүп, ал каза болду. Бул тууралуу Баткен облустук ички иштер башкармалыгы билдирди.

Кырсык 21-апрель түшкү саат 12:30 чамасында болгон. Анда Кадамжай районунун Кара-Дөбө айылы аркылуу өткөн Ош–Баткен–Раззаков жолунун 95-чакырымында Мерседес-Бенц-312 үлгүсүндөгү автоунааны башкарып бара жаткан Үч-Коргон айылынын тургуну, 1986-жылы туулган Ш.А.Ю, жолдун оң тарабында жүргөн жөө жүргүнчүнү коюп кеткен. Кырсыктын кесепетинен Арпа-Сай айылынын 2007-жылы туулган тургуну Р.А.Ш. алган жаракаттарынан улам Үч-Коргон аймактык ооруканасына жетпей каза болгон.

Бул факты боюнча Кылмыш-жаза кодексинин 312-беренеси (Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу) менен иш козголуп, унаанын айдоочусу камакка алынган.

Учурда бул жол кырсыгы боюнча тергөө иштери жүрүүдө.