Эл аралык издөөдө жүргөн жаран Түркиядан Кыргызстанга жеткирилди

Диний кастыкты козуткан материалдарды таратууга шектелип эл аралык издөөдө жүргөн кыргызстандык Түркиядан кармалды. Бул туурасында ИИМдин басма сөз кызматы билдирди.

Маалымдалгандай, 2012-жылы А.Д. аттуу жаран диний кастыкты козутууну жараткан материалдарды таратуу иш аракеттерди кылып, Ош облусунун Араван РИИБи тарабынан Кылмыш-жаза кодексинин 332-беренеси менен кылмыш иши козголгон. Ал эми шектүү изин жашырып качып кетип, эл аралык издөөгө алынган.

Шектүү 2006-жылдан тартып "Хизб-ут-Тахрир" экстремисттик уюмунун активдүү мүчөсү экендиги жана мурун соттолгон экендиги аныкталгандыгы маалыматта кошумчаланган.

Такталган маалыматтар боюнча, издөөдө жүргөн 1978-жылы туулган А.Д. аттуу жаран 2012-жылы Орусияда, 2016-жылдан бери Түркияда изин жашырып жүргөн.

Бирдиктүү иш-аракеттердин натыйжасында 24-апрелде ал Түркиядан Кыргызстанга жеткирилди.

Учурда иликтөө иштери жүрүүдө.