Трамп Израилдин Ирандын өзөктүк куралдар объектилерине сокку уруу планын четке какты

Израил май айында Ирандын өзөктүк куралдар объектилерине сокку урууну пландаган, бирок АКШ президенти Дональд Трамп анын өзөктүк программасы боюнча Тегеран менен сүйлөшүүнү туура көрүп, операцияны колдоодон баш тартты. Бул туурасында чет элдик басылмалар жазышууда.

"Израилдин расмий өкүлдөрү келерки айда Ирандын өзөктүк объектилерине кол салуу боюнча конкреттүү пландарды түзүшкөнү кабарланууда. Алар ишке ашырууга даяр жана АКШнын колдоосуна үмүттөнүшкөн. Сунуштардын максаты, булактардын айтымында, Тегерандын өзөктүк программасын кеминде бир жылга басаңдатуу", - деп айтылат маалыматта.

Учурда Трамп дипломатияны тандап алганы белгиленген. Өзүнүн биринчи мөөнөтүндө ал Обаманын администрациясынын тушунда сүйлөшүлгөн Ирандын өзөктүк келишимин бузган. Бирок экинчи мөөнөтүндө Жакынкы Чыгышта дагы бир согушка кошулбоо үчүн ал Тегеран менен сүйлөшүүлөрдү баштады жана анын өзөктүк программасы боюнча келишимге жетишүү үчүн бир нече ай гана убакыт берди.

Ушул айдын башында Трамп Израилдин кол салуусун колдобой турган чечимин билдирген. Ал муну өткөн аптада Вашингтонго жасаган иш сапары учурунда премьер-министр Биньямин Нетаньяху менен талкуулап, Овал кеңсесинде АКШ Иран менен сүйлөшүүлөрдү баштаганын жарыялаган.