Садыр Жапаров Кыргызстандын атынан Ирандын президентине көңүл айтты

Президент Садыр Жапаров Бендер-Аббас шаарындагы деңиз портунда болгон жарылууда адамдардын каза болушуна байланыштуу Иран Ислам Республикасынын президенти Масуд Пезешкианга көңүл айтуу телеграммасын жөнөттү. Бул туурасында мамлекет башчысынын басма сөз кызматы билдирди.

"Бандер-Аббас шаарында Шахид Ражаи деңиз портунда болгон жарылуунун кесепетинен адамдар каза болду деген суук кабарды терең кайгыруу менен кабыл алдым.

Каза болгондордун үй-бүлөлөрүнө жана жакындарына аза кайгысын тең бөлүшүп, көңүл айтам, ал эми жабыр тарткандардын тез арада сакайып кетишин каалайм", – деп айтылат мамлекет башчысынын телеграммасында.

Белгилей кетсек, буга чейин Ирандын түштүгүндөгү Перс булуңунун жээгиндеги Бандар-Аббас портунда адам өмүрүн алган жарылуу катталып, миңден ашуун жаран жабыркагандыгы айтылган.