Өлкөгө тооктун жумурткасын ташып келүүгө убактылуу тыюу салынды. Себеби

Кыргызстанга тооктун жумурткасын ташып келүүгө 6 айга убактылуу тыюу салынды. Бул тууралуу Суу ресурстары, айыл чарба жана кайра иштетүү өнөр жайы министрлиги кабарлады.

Маалыматка ылайык, 1-майдан тартып жарым жылга чейин (6 ай) өлкөгө жумуртка импорттоого болбойт.

Министрлик 10-февралдан ушул күнгө чейин өлкө аймагына коңшу мамлекеттерден жумуртка импорттолбогонун, тескерисинче, 2025-жылдын январь-март айларында Кыргызстандан бир эле коңшу Казакстанга 8 миллион 812 даана жумуртка экспорттолгонун белгиледи.

Айыл чарба министрлиги мындай чечим азык-түлүк коопсуздугун камсыз кылуу жана товардын базардагы баасын турукташтыруу максатында кабыл алынганын белгиледи. Ошондой эле өлкөдө ири жана чакан тоок фермаларынын ортосундагы атаандаштыктан улам тооктун жумурткасы көбөйүп кеткенин кошумчалады.