Украина дүйшөмбүдөн тарта 30 күндүк ок атышууну токтотууга даяр экенин билдирди

Бүгүн, 10-майда Франциянын президенти Эммануэль Макрон, Улуу Британиянын премьер-министри Кир Стармер, Германиянын канцлери Фридрих Мерц жана Польшанын премьер-министри Дональд Туск Киевге келди. Бул туурасында Украинанын тышкы иштер министри Андрей Сибига билдиргенин чет элдик басылмалар жазышууда.

Маалымдалгандай, алар Украинанын президенти Владимир Зеленский менен жолуккан соң АКШнын лидери Дональд Трампка телефон аркылуу байланышкан.

“Киевдеги каалоочулардын коалициясынын жолугушуусунан кийин бардык беш лидер – Владимир Зеленский, Эммануэль Макрон, Фридрих Мерц, Дональд Туск жана Кир Стармер АКШнын президенти Дональд Трамп менен тынчтык аракеттери боюнча конструктивдүү сүйлөшүүлөрдү телефон аркылуу өткөрүштү.

Украина жана анын союздаштары 11-майдан тарта кургактыкта, абада жана деңизде кеминде 30 күн бою толук, эч кандай шартсыз ок атышууну токтотууга даяр.

Эгер Орусия макул болуп, эффективдүү мониторинг камсыз кылынса, ок атышууну токтотуу жана ишенимди бекемдөө чаралары тынчтык сүйлөшүүлөрүнө жол ачышы мүмкүн”, - деп билдирген Сибига басылмаларга.

Айта кетсек, буга чейин Дональд Трамп Орусия менен Украинаны 30 күндүк ок атышпоого чакырган. Ал эми Орусия президентинин басма сөз катчысы Дмитрий Песков Украина менен ок атышпоо келишими түзүлсө, батыш өлкөлөрү Киевге курал-жарак берүүнү токтотушу керектигин эскерткен.