"Кыргыз айымынын изи калды". Асел Байбагышева Эверестти багындырды

Бүгүн, 11-майда Асел Байбагышева Эверест чокусун багындырып, ага чыккан биринчи кыргыз айымы болду. Бул туурасында белгилүү альпинист Кадыр Сайдилкан социалдык баракчасынан билдирди.

Анын айтымында, альпинист айым бүгүн, 11-майда саат 9:15те жер жүзүндөгү эң бийик тоонун чокусуна чыгып, Кыргызстандын желегин көтөрдү.

"Сүйүнчү, жаңы тарых жаралды. Кыргыз элиме кут болсун! Асел Байбагышева 2025-жылдын 11-майында эртең мененки саат 9:15те негизги жатактан чокуга чейин рекорддук убакытта 2 күндө же болбосо 54 саатта чыгып, кыргыз желегин аалам чокусу Эверестте желбиретти. Кыргыз айымынын кыйындыгын, кайраттуулугун, чыдамкайлыгын, шамдагайлыгын ааламга жар салды. Аалам чокусунда кыргыз айымынын изи калды. 2025-жылдын сезонунда Эверест чокусуна чыккан дүйнөдөгү алгачкы айым болду. Аман-эсен түшүп кел!" - деп калтырган билдирүүсүндө.

SUPER.KG порталынын Асел Байбагышева менен курган маегин шилтемеден окуй аласыздар. Ал Эверестти багындырууну көздөп, даярдык көрүп жаткан учурда манилүү жаңылыктары менен бөлүшкөн.