АКШ менен Кытай товарлардын бажы төлөмүн кыскартууну макулдашты

Женевадагы сүйлөшүүлөрдүн жыйынтыгында АКШ менен Кытайдын делегациялары 90 күндүк мөөнөткө өз ара бажы төлөмдөрүн сезилээрлик деңгээлде кыскартууну макулдашты. Мындай чечимди АКШнын Каржы министри Скотт Бессент менен Кытайдын соода министри Ли Ченьян жарыялашканын чет элдик басылмалар кабарлашты.

Маалымдалгандай, келишимдин алкагында Вашингтон 14-майдан тарта кытай товарларына салыкты 145 пайыздан 30га чейин, ал эми Пекин америкалык товарларга салыкты 125ден 10 пайызга чейин төмөндөтөт.

"Жогорудагы аракеттерди аяктагандан кийин тараптар экономикалык жана соода мамилелери боюнча талкууну улантуу механизмин түзүшөт", - деп айтылат Ак үйдүн сайтында жарыяланган билдирүүдө.

Айта кетсек, АКШнын президенти Дональд Трамп ппрель айынын башында АКШ Кытайдан келген товарларга бажы төлөмдөрүн 145 пайызга чейин жогорулаткан. Кытай буга жооп кылып, америкалык товарларга 125 пайыздык бажы салыгын киргизген.