Бишкектеги №67 мектептин биринчи кабатында 11 бөлмө менчиктештирилип кеткен

Бишкек шаарындагы №67 мектептин жалпы аянты 751,2 чарчы метр болгон жеке имаратын менчиктештирүүдө мыйзам бузуу фактысы аныкталды. Бул тууралуу УКМКнын маалымат борбору кабарлады.

Маалымдалгандай, 1988-жылы аталган мектеп СССР илимдер академиясынын Космос илим-изилдөө институтунун атайын конструктордук бюросунун муктаждыктары үчүн 11 окуу бөлмөсүн бөлүп берген. Аталган мекеме 1992-жылы акционердик коом болуп өзгөртүлгөн. Кийинчерээк аталган жай жеке менчикке сатылган.

Мекеменин учурдагы ээси менчиктештирүү учурундагы мыйзамсыз иш аракеттерди моюндап, мамлекеттин менчигине акысыз өткөрүп берген. Учурда ал жай ЖРТга окуучуларды даяроо багытындагы мекемеге ижарага берилди.