Польшанын жаңы президенти белгилүү болду

Кечээ, 1-июнда Польшада өткөн президенттик шайлоодо талапкер Кароль Навроцкий 51 пайыз добуш менен жеңишке жетти. Бул тууралуу польшалык TVP каналы билдирди.

Ал эми анын атаандашы, Варшава шаарынын мэри Рафал Тшасковский 49 пайыз добуш алган. Биринчи турда Тшасковский 31,36 пайыз, ал эми Навроцкий 29,54 пайыз добушка ээ болгон.

Кароль Навроцкий "Укук жана адилеттүүлүк" партиясынан талапкер болгон. Ал өзүнүн консервативдик көз карашы жана улуттук суверенитетти колдоосу менен таанылган. Өзүнүн шайлоо программасында ал кошумча нарк салыгын 23 пайыздан 22 пайызга чейин төмөндөтүүнү, эки жана андан көп баласы бар үй-бүлөлөр үчүн жеке кирешеден салык албаган системди киргизүүнү сунуштаган.

"Навроцкийдин жеңиши "Укук жана адилеттүүлүк" партиясынын аброюн бекемдеп, Польшадагы саясий кырдаалга, анын ичинде мыйзам чыгаруу жана тышкы саясат боюнча түзүмдөргө таасирин тийгизиши мүмкүн",- деп чет элдик басылмалар жазышууда.