ИИМ: Өзбекстанда үй-бүлөлүк зомбулук боюнча аймактык тегерек стол өттү

Кыргызстан, Казакстан жана Өзбекстандын ички иштер органдарынын, сот, пробация, аялдардын жана балдардын укуктарын коргоо боюнча улуттук мекемелеринин өкүлдөрүнүн катышуусунда Ташкентте эл аралык юридикалык форум өттү. Бул тууралуу бүгүн, 3-июнда ИИМдин басма сөз кызматы билдирди.

Маалыматка ылайык, иш-чара "Үй-бүлөлүк зомбулукка карата сот адилеттигинин макулдашылган реакциясын калыптандыруу: аймактык тажрыйба жана тобокелдиктерди баалоону колдонуу" деген темада өттү.

Белгиленгендей, жыйында эл аралык стандарттарга жана инновациялык чечимдерге, анын ичинде санариптик инструменттерге жана мекемелер аралык кызматташуу механизмдерине өзгөчө көңүл бурулду. Бардык спикерлер жабыр тарткандарды коргоону жогорулатуу жана укук бузуучулардын жоопкерчилигин камсыз кылуу үчүн системдүү жана координацияланган чаралардын зарылдыгын баса белгилешти. Мындан тышкары, бардык катышуучулар зордук-зомбулук жүрүм-турумун өзгөртүү боюнча программаларды ишке ашыруунун маанилүүлүгү жөнүндө бирдиктүү түшүнүктү билдиришти.