Өлкөдөгү балыктардын массалык өлүмү тууралуу тараган маалымат жалган

Социалдык тармактарда балыктар массалык түрдө өлүп жатат делген видеонун тарашы боюнча Балык өнөр жай комплекси департаменти билдирүү таратты.

Өлкөнүн жаратылыш ресурстары, экология жана техниклык көзөмөл министрлигине караштуу Экологиялык жана техникалык көзөмөл кызматынын кызматкерлери тарабынан 12-майда Чүй облусундагы Чу дарыясынын суусунун үлгүсү алынып, Экологиялык мониторинг департаментинин лабораториясында изилденип, жыйынтыктары боюнча суу таза деп чыккан.

Сокулук райондук ветеринардык башкармалыгынын кызматкерлери тарабынан алынган балыктардын үлгүлөрү Ветеринардык диагностика жана экспертиза борборунун химия-токсикология жана ВСЭ, вирусология жана молекулярдык диагностика, паразитология бөлүмдөрүнө изилдөөгө жөнөтүлгөн. Изилдөөлөрдүн жыйынтыгы менен балыктардын үлгүлөрү таза деп чыккан.