Министрлер кабинетинин кызматкерлерине коюлган квалификациялык талаптар өзгөртүлөт

Президент Садыр Жапаров “Кыргыз Республикасынын министрлер кабинети жөнүндө” конституциялык мыйзамга өзгөртүү киргизүү тууралуу” конституциялык мыйзамга кол койду. Бул тууралуу бүгүн, 10-июнда президенттин маалымат кызматынан билдиришти.

Конституциялык мыйзам 4-июнда Жогорку Кеңеш тарабынан кабыл алынган. Ал министрлер кабинетинин ишин өркүндөтүү максатында иштелип чыккан.

Ага ылайык:

– Министрлер кабинетинин төрагасынын жана аталган мекеменин башка мүчөсүнүн кызмат орундарын жогорку билимге ээ, мамлекеттик жана (же) муниципалдык кызматтарда жалпысынан 7 жылдан кем эмес иш тажрыйбасы бар, анын ичинде жетекчи кызмат орундарында 5 жыл, ошондой эле 10 жылдан кем эмес иш тажрыйбасы бар адамдар ээлей алат;

– Аткаруу бийлигинин башка органынын жетекчисинин кызмат ордун жогорку билимге ээ, мамлекеттик жана (же) муниципалдык кызматтарда жалпысынан 5 жылдан кем эмес иш тажрыйбасы бар, анын ичинде жетекчи кызмат орундарында 3 жыл, ошондой эле 7 жылдан кем эмес иш тажрыйбасы бар адамдар ээлей алат.

Аталган конституциялык мыйзам расмий жарыяланган күндөн тартып он күн өткөндөн кийин күчүнө кирет.