Түндүк Ирландияда баш аламандык учурунда 17 полиция кызматкери жабыркады (видео)

Түндүк Ирландияда мигранттарга каршы өткөн нааразылык акцияларында 17 полиция кызматкери жабыркады. Бул тууралуу чет элдик басылмалар жазышты.

Баллимена шаарындагы Клонавон-Террис аттуу райондо үч миңден ашуун жаран бир нече саат бою полиция кызматкерлерине күйүүчү суюктук куюлган бөтөлкөлөрдү, таштарды жана кыштарды ыргытышкан. Тартип сакчылары 29 жаштагы жаранды кармашкан.

Полиция нааразылык билдирип жаткандарга каршы резина ок колдонду. Баш аламандык учурунда төрт үй өрттөлдү. Шаар бийлиги Англия жана Уэльстен жардам сурай турганын билдирди.

Белгилей кетсек, баш аламандык 14 жаштагы эки румыниялык мигранттын өспүрүм кызды зордуктоого аракет кылган деп айыпталгандан кийин башталган. Эки айыпталуучу тең коюлган айыпты четке кагып жатканы айтылууда.