Орусия менен Украина туткундагы аскер кызматкерлеринин кезектеги алмашуусун өткөрүштү

Орусия менен Украина 12-июнда согуш туткундарын алмаштыруунун жаңы раундун өткөргөнүн президент Владимир Зеленский билдирди. Бул тууралуу чет элдик басылмалар жазышууда.

"Бүгүн биздин армиянын жоокерлери, улуттук гвардиячылар, чек арачылар үйдө. Алардын баары дарыланууга муктаж жана аларга сөзсүз түрдө керектүү жардам көрсөтүлөт. Бул оор жарадар болгон жана оор оорулуу жоокерлердин кайтып келишинин экинчи этабы",- деп жазды украин президенти өзүнүн Telegram каналында.

Орусиянын Коргоо министрлиги алмашуу болгонун тастыктады. Орусия да, Украина да алмашылган аскерлердин так санын маалымдаган жок.

Белгилей кетсек, Стамбулдагы сүйлөшүүдө Орусия менен Украинанын делегациялары макулдашкан масштабдуу алмашуу 9-июнда башталган. 11-июнда каза болгон 1212 жоокердин сөөгү Украинага, ал эми каза болгон 27 жоокердин сөөгү Орусияга кайтарылган.