АКШда 10 миллиондон ашык жашоочуга катуу ысык тууралуу эскертүү берилди

АКШнын Аризона жана Невада штаттарында жашаган 10 миллиондон ашык тургунга абдан катуу ысык аба ырайы тууралуу эскертүү берилди. Бул тууралуу чет элдик басылмалар жазышты.

Ушул тапта аталган аймактарда экстремалдуу ысык аба ырайы өкүм сүрүп жатат. Жарандарга салкындаткыч жабдуулары бар жайларда калууну, сыртка чыкпоону жана көп суу ичүүнү сунушташууда синоптиктер.

Кээ бир жерлерде абанын температурасы 48,9 градуска чейин жетиши мүмкүн деп айтылууда. Ал эми "Өлүм өрөөнү" деп аталган улуттук парктын аймагында күндүн ысыктыгы андан да жогору болушу ыктымал.

Эскертүү: Мындай абдан ысык аба ырайы адамдардын ден соолугу үчүн кооптуу болушу мүмкүн. Өзгөчө жаш балдар, кары-картаңдар жана өнөкөт оорусу барлар сак болушу керек.