Адылбек Касымалиев Кытайда белгилүү компаниялардын жетекчилери менен жолугушту

Бүгүн, 25-июнда министрлер кабинетинин төрагасы Адылбек Касымалиев Бүткүл дүйнөлүк экономикалык форумдун жылдык жыйынына ("Жайкы Давос - 2025") катышуусунун алкагында бир катар кытай компанияларынын жетекчилиги менен жолугушууларды өткөрдү.

Атап айтканда, Касымалиев энергетикалык жабдууларды өндүрүү жаатында дүйнөлүк лидерлердин бири болгон "Dongfang Electric corporation" мамлекеттик ишканасынын өкүлдөрү менен жолугушту. Тараптар энергетика тармагында кызматташууну өнүктүрүү жана масштабдуу долбоорлорду ишке ашыруу келечегин талкуулашты.

Андан ары "China Energy International GroupCo. Ltd" компаниясынын вице-төрагасы Сюе Данфэн менен жолугушуу болду. Компания өлкөбүздүн энергетика секторунда, атап айтканда, ГЭСтерди курууда, ошондой эле кайра жаралуучу энергия булактары жаатында долбоорлорду ишке ашырууга кызыкдар.

"Reclaim Group" жана "Hengyu Group" компанияларынын өкүлдөрү менен да жолугушуп, курулуш жана инфраструктуралык өнүктүрүү, гидроэнергетика жана суу чарба инфраструктурасы жаатында биргелешкен долбоорлорду ишке ашыруунун келечеги талкууланды.