Ысык-Көлдө сууга чөгүп бараткан 10 жаштагы баланы милиция кызматкери куткарып калды

Ысык-Көлдө сууга чөгүп бараткан 10 жаштагы баланы милиция кызматкери куткарып калды. Окуя 24-июнда болгонун бүгүн, 26-июнда Ысык-Көл облустук милициясынын басма сөз кызматы билдирди.

Маалыматка ылайык, милициянын лейтенанты Акылбек Макеевдин айтымында, окуя Жети-Өгүз районунун жапайы пляждарынын биринде, эски порттун кооптуу бөлүгүндө орун алган. Бала сууга түшүп, тереңдиктин кескин өзгөрүшүнө туш болуп, өз алдынча чыгалбай калган. Кыйкырыктарды уккан жакын жерде жүргөн милиция кызматкери дароо сууга чуркап, баланын артынан секирген.

Бир мүнөттүн ичинде бала жээкке аман-эсен чыгарылды.

"Баары трагедия менен аяктамак. Бирок ошол учурда Акылбек Макеев уулумду сактап калды. Менин уулум - менин дүйнөм. Аны сактап калган бул адам менин жашоомду сактап калды,"- деди баланын апасы.

Ысык-Көл ОИИБи жарандарды сууга түшүүдө коопсуздук эрежелерин сактоого чакырат.