Сергей Лавров расмий сапары менен Кыргызстанга келет

Орусиянын тышкы иштер министри Сергей Лавров 29-июнда Кыргызстанга расмий сапар менен келет. Бул тууралуу Орусия ТИМинин расмий өкүлү Мария Захарова билдирди.

Маалыматка ылайык, иш сапары Кыргызстандын тышкы иштер министринин чакыруусу менен Чолпон-Ата шаарында өтөт. Сапардын алкагында Лавров өлкө башчысы Садыр Жапаров менен да жолугушат.

Бул сапар Орусия менен Кыргызстандын ортосундагы стратегиялык өнөктөштүктү жана союздаштык мамилелерди тереңдетүүгө багытталган. Сүйлөшүүлөрдө саясий, соода-экономикалык, аскердик-техникалык, маданий-гуманитардык кызматташтык жана башка тармактар боюнча кызматташтыкты кеңейтүү маселелери талкууланат.

Мындан тышкары, тараптар регионалдык жана глобалдык маселелер боюнча пикир алмашып, Евразиялык интеграциянын өнүгүү жолдорун, Кыргызстан учурда төрагалык кылып жаткан ЖККУ жана 2025-жылдын сентябрынан баштап башчылык кыла турган ШКУ алкагындагы аракеттерди да сүйлөшүшөт.

Захарованын айтымында, Борбордук Азиядагы коопсуздук маселелери өзгөчө көңүл борборунда болот. Эл аралык экстремисттик жана террордук коркунучтарга, ошондой эле тышкы күчтөр тарабынан туруктуулукту бузууга каршы кошумча аракеттерди күчөтүү маселелери да талкууланат.