Супер-Инфо
super.kg видео
Иран МАГАТЭ менен кызматташтыгын убактылуу токтотту
Ирандын президенти Масуд Пезешкиан аталган өлкөнүн Эл аралык атомдук энергия агенттиги (МАГАТЭ) менен кызматташтыгын убактылуу токтотуу тууралуу жарлыкка кол койду. Бул тууралуу жергиликтүү Tasnim агенттиги жазып чыкты.
Маалым болгондой, мыйзам президент тарабынан кол коюлгандан тартып күчүнө кирет. Мыйзамда Иран өкмөтүнө МАГАТЭ менен кызматташтыкты токтотуу милдети жүктөлүп, агенттиктин инспекторлору өлкөгө кирүүгө уруксат алуу үчүн Улуттук коопсуздук жогорку кеңешинин макулдугун алышы керек деп белгиленген. Бул кадамдын негизги себеби катары Ирандын ядролук объекттерине коопсуздуктун камсыздалбаганы жана МАГАТЭнин саясий көз карашы айтылган.
Ирандын президенти Пезешкиан 27-июнда видео кайрылуусунда Израил менен АКШнын Ирандын ядролук объекттерине жасаган чабуулдарын эл аралык өзөктүк куралды жайылтпоо режимине каршы жасалганын белгилеп, МАГАТЭнин башчысы Рафаэль Гроссинин бул чабуулдарга жоопсуз калуусун сынга алган.
Ирандын президенти Пезешкиан буга чейин 2024-жылдын ноябрь айында МАГАТЭнин башчысы Гроссиге жолукканда Ирандын ядролук программасы тынчтык максатында гана экенин жана Иран эч качан ядролук курал өндүрүүгө аракет кылбай турганын билдирген. Ал Ирандын ядролук программасы МАГАТЭ менен кызматташтыкта жүрүп жатканын белгилеген.
0