Индияда сел жүрүп, 50дөн ашык адам каза тапты (видео)

Индиянын түндүгүндөгү Химачал-Прадеш штатында катуу жааган жаандан улам сел жүрүп, 51 адам каза тапты. 100дөн ашык адам жаракат алды. Бул тууралуу NDTV телеканалы кабарлады.

Акыркы жумада катуу жааган жаан-чачын, суу ташкыны жана жер көчкү 12 райондун тургундарына чоң зыян алып келди. Учурда 22 адам дайынсыз болууда. Штатта 400дөн ашык жол жабылып, көптөгөн турак үйлөр, көпүрөлөр, электр чубалгылары жана айыл чарба жерлери жабыркады.

Индиянын метеорология департаменти аймакта жакынкы күндөрү кооптуу аба ырайы күтүлүп жатканын билдирди. Жергиликтүү бийлик өкүлдөрү калкты этият болууга жана мүмкүн болушунча коопсуз жерлерде болуп туруу керектигин эскертүүдө.

Химачал-Прадеш штатында жаан-чачын мезгили июндун аягынан сентябрга чейин созулат.