Түрк оппозициясы Имамоглуну колдоо үчүн 20 миллиондон ашык кол топтоду

Түрк оппозициясы Стамбулдун камалган мэри Экрем Имамоглуну президенттикке талапкер катары колдоо үчүн 20 миллиондон ашык кол топтоду. Бул тууралуу шейшемби күнү кечинде калаа мэриясынын жанында Имамоглунун камалышынын 100 күндүгүнө байланыштуу уюштурулган митингде Республикалык элдик партиянын лидери Озгур Озел билдирди.

"Бир тараптан Түркия буга чейин көрбөгөн митингдерди уюштуруп жатабыз. Экинчи жагынан дүйнөлүк саясий тарыхтагы эң чоң кол топтоо иш-чарасын өткөрүп жатабыз. Алардын саны азыр 20 миллиондон ашты",- деди ал.

Эске салсак, Имамоглу коррупция жана террорчулар менен байланышы бар деген айып менен 19-мартта кармалып, соттун чечими менен 23-мартта камакка алынган. Ал камакка алынгандан кийин Түркияда нааразычылык акциялары күчөгөн. Анын алкагында митингдин 2 миңге жакын катышуучусу кармалганы кабарланган.

Түркияда мөөнөтүнөн мурда президенттик шайлоо өткөрүү жана Имамоглуну колдоо үчүн кол топтоо иши 30-мартта башталган. Анда 28 миллион кол топтоо планы жарыяланган болчу.

Түркияда президенттик шайлоо 2028-жылга белгиленген. Бирок оппозиция мөөнөтүнөн мурда шайлоо өткөрүүнү талап кылууда.