Уюшкан кылмыштуу топтордун биринин активдүү мүчөсү "алдамчылык" беренесине шектелип кармалды

Чүй ОИИББинин Уюшкан кылмыштуулукка каршы күрөшүү башкармалыгы тарабынан “унаа сатып алууда алдамчылыкка барган” деген шек менен бир адам кармалды. Бул туурасында аталган мекеменин басма сөз кызматы билдирди.

Маалыматка караганда, 2013-жылдын ноябрь айында Бишкек шаарынын 37 жаштагы тургуну Ысык-Ата районунун жашоочусунун ишеничине кирип “бөлүп төлөп берем” деп ВМW X-5 унаасын сатып алган. Бирок сатып алуучу ушул убакка чейин унаанын акчасын бербей качып жүргөн. Бул факты боюнча 166-берене (алдамчылык) менен кылмыш иши козголгон. Милиция кызматкерлери тарабынан жүргүзүлгөн бир катар иш-чаралардын негизинде кылмышка шектелип Бишкек шаарынын 37 жаштагы тургуну кармалган. Ал уюшкан кылмыштуу топтордун биринин активдүү мүчөсү болгон. Учурда тергөө амалдары жүрүп жатат.