Иордания Газа тилкесинен дагы 23 оорулуу баланы эвакуациялады

Иорданиянын Куралдуу күчтөрү, Падыша II Абдуллахтын февраль айында баштаган гуманитардык демилгесинин алкагында Газа тилкесинен оорулуу 23 баладан турган алтынчы топту эвакуациялады. Бул тууралуу өлкөнүн расмий маалымат агенттиги Petra билдирди.

Маалыматка ылайык, эвакуацияланган 23 оорулуу баланы 46 үй-бүлө мүчөсү коштоп жүрдү. Эвакуацияланган балдардын 19у Иорданиядагы жеке ооруканада дарыланышат. Калган 4 бала 7 тууганы менен бирге дарылануу үчүн Түркияга жөнөтүлөт.

Кабарда, ооругандар Иорданиянын Саламаттык сактоо министрлиги жана Дүйнөлүк саламаттык сактоо уюму менен биргеликте кабыл алынганы, эвакуациянын эң жогорку медициналык стандарттарга ылайык жүргүзүлгөнү белгиленет.

Бул эвакуация менен март айынан бери Иорданияга оорулуу балдардын саны 77ге, аларды коштогон үй-бүлө мүчөлөрү 169га жетти.

Эвакуациялар көбүнчө Газанын түштүгүндөгү Керем Абу Салим чек ара бекети аркылуу Дүйнөлүк саламаттык сактоо уюму жана Израилдин түз координациясы менен ишке ашырылат.

Падыша Абдуллах 2024-жылдын 11-февралында АКШнын президенти Жо Байден менен Ак үйдө жолукканда, Иордания Газадан 2 миң оорулуу баланы кабыл алууга даяр экенин айткан. Байден бул демилгенин колдоорун билдирген.