Кыргыз-Тажик чек арасындагы эки көзөмөл-өткөрүү пунктунун иши жандандырылды 

Бүгүн, 8-июлда өлкө башчы Садыр Жапаров жана Тажикстан президенти Эмомали Рахмон видеобайланыш аркылуу Ош облусундагы "Карамык" жана "Бордөбө" көзөмөл-өткөрүү пункттарынын ишин жандандыруу аземине катышышты. Иш-чара Садыр Жапаровдун Тажикстанга болгон мамлекеттик сапарынын алкагында өткөрүлгөнүн президенттик адимистрациядан кабарлады.

Эки өлкөнүн чек ара мекемелеринин жетекчилери өткөрүү пункттарынын ишин кайра жандандырууга толук даяр экендиктерин билдиришти. Баяндаманы уккандан кийин Жапаров көзөмөл өткөрүү жайларынын ишин баштоо боюнча буйрук берди. Андан соң Кыргыз тарапта шлагбаумдар көтөрүлдү.

Андан кийин Эмомали Рахмон Тажикстандын аймагындагы өткөрүү пункттарынын ишин кайра жандандыруу боюнча буйрук кылып, шлагбаумдар көтөрүлдү.