Белгияда электрондук музыка фестивалы өтүүчү чоң сахна күйүп кетти (видео)

Белгиянын Бом шаарында Tomorrowland фестивалынын негизги сахнасы күйүп кетти. Электрондук музыка фестивалынын ачылышы эртең, 18-июлда болмок.

Чет элдик маалымат каражаттарынын жазгандарына караганда, иш-чарага 100 миңге жакын конок келери күтүлүп жаткан. Өрт чыккан учурда фестивалдын ачылышын даярдап жаткан адистер болгон. Алардын эч бири жабыркаган эмес.

Окуя болгон жерден тартылган видеодо өрт жалыны толугу менен жасалгаланган сахнаны каптап жатканын, жакын жерде "Тез жардам" унаалары токтоп турганын көрүүгө болот. Учурда тилсиз жоонун келип чыгышынын себептери тактала элек.

Айта кетсек, Tomorrowland 2005-жылдан бери өткөрүлүп келет жана дүйнөдөгү эң белгилүү электрондук музыка фестивалдарынын бири.