Европа өлкөлөрү Палестинаны мамлекет катары тааныйт. Ага ким каршы?

Макрондун билдирүүсү

Франциянын президенти Эммануэль Макрон Жакынкы Чыгышта тынчтыкка жетишүү үчүн өлкөнүн 2026-жылы БУУнун Башкы ассамблеясында Палестина мамлекетин тааный турганын айтты. Бул тууралуу ал 24-июлда X социалдык тармагына (мурдагы Twitter) жазды.

"Жакынкы Чыгышта адилеттүү жана туруктуу тынчтык орнотууга болгон тарыхый милдеттенмемдин негизинде мен Франция Палестина мамлекетин тааныйт деп чечтим. Бул салтанаттуу декларацияны келерки сентябрда Бириккен Улуттар Уюмунун Башкы ассамблеясында жасайм",- деп айтылат билдирүүдө.

Ал белгилегендей, бул Газа тилкесиндеги палестиналык-израилдик жаңжалды токтотууга, ошондой эле жергиликтүү тургундарды сактап калууга жана ар тараптуу жардам көрсөтүүгө салым кошот. Палестина өлкөсүн таануу палестиналык радикалдык ХАМАС кыймылын демилитаризациялоого жана Газа тилкесинде коопсуздукту камсыздоого мүмкүндүк берет.

Франциянын демилгесин ким кубаттайт?

Испаниянын премьер-министри Педро Санчес Франциянын президенти Эммануэль Макрондун Палестина мамлекетин таануу чечимин колдоду. Ал дагы кечээ, 24-июлда X социалдык тармагына (мурдагы Twitter) жазды.

"Франциянын, Испаниянын жана башка Европа өлкөлөрүнүн Палестина мамлекетин таануусун колдоорун кубаттайм. Нетаньяху жок кылууга аракет кылып жаткан нерсени коргоо үчүн баарыбыз чогуу иштешибиз керек",- деп айтылат билдирүүдө.

Санчес эки мамлекетти түзүү Палестина-Израил чатагын чечүүнүн жалгыз жолу экенин белгиледи.

Палестинадан Макронго жооп

Палестинанын вице-президенти Хусейн аш-Шейх Франциянын президенти Эммануэль Макрондун Палестина мамлекетин таануу ниетине ыраазычылык билдирди.

"Улуу даражалуу президент Эммануэль Макронго Франциянын туруктуу позициясын ырастаган жана анын Палестина мамлекетин таануу ниетин ырастаган улуу даражалуу президент Махмуд Аббаска жазган каты үчүн ыраазычылыгыбызды билдиребиз",- деп айтылат билдирүүдө.

Ал ошондой эле Сауд Арабиясына Палестинаны көз карандысыз жана эгемен мамлекет катары таанууга көрсөткөн жардамы үчүн ыраазычылык билдирди. Өлкөнүн вице-президенти Франциянын бул кадамы өлкөлөрдүн эл аралык укукка берилгендигин көрсөтүп турганын баса белгиледи.

Бул чечимге ким каршы?

Израилдин премьер-министри Биньямин Нетаньяху Франциянын президенти Эммануэль Макрондун Палестина мамлекетин таануу чечимин айыптап, муну террорду кубаттоо деп атады.

"Биз президент Макрондун 7-октябрдагы трагедиядан кийин Тель-Авивдин жанындагы Палестина мамлекетин таануу чечимин катуу айыптайбыз. Мындай кадам террорго үндөп, Газа менен болгон окуяга окшош дагы бир ирандык марионетка мамлекетинин түзүлүшү коркунучун жаратат",- деп айтылат билдирүүдө.

Нетаньяху Палестинаны көз карандысыз жана суверендүү мамлекет катары таануу Израилдин жок болушуна алып келиши мүмкүн экенин белгиледи.