Балыкчы–Бишкек поезди бейбаштар тарабынан ташбаранга алынды (видео)

Балыкчы–Бишкек каттамы боюнча жүргүнчү ташуучу поезддин вагондоруна таш ыргытуулар болду. Бул тууралуу "Кыргыз темир жолу" ишканасы билдирди.

Маалыматка ылайык, окуя кечээ, 25-июлда саат 21:47 чамасында Токмокто болгон. Анда белгисиз адамдар бир нече вагон, анын ичинде VIP-вагондорго да таш ыргытышкан. Вагондордо жүргүнчүлөр болгон.

Ишкана вагондордун терезелери соккуга туруктуу материалдан болгондуктан сынбаганын, бирок жаракалар кеткенин белгиледи. Келтирилген зыяндын бардык фактылары катталып, укук коргоо органдарына бейбаштарды жоопкерчиликке тартуу боюнча өтүнмө берилген.

"Кыргыз темир жолу" бейбаштык аракеттерди кескин айыптай турганын, анткени мындай учурлар темир жолдун мүлкүнө гана зыян келтирбестен, жүргүнчүлөрдүн коопсуздугуна да коркунуч туудурарын жана өлкөнүн туризм тармагындагы аброюна шек келтирерин белгиледи.

Эске салсак, апрель айында да туристтик поезддин вагондорунун терезелерине таш ыргытылган учур катталган.