Трамп Таиланд менен Камбоджанын өкмөт башчылары жолугушарын билдирди

Камбоджанын премьер-министри Хун Манет жана Таиланддын өкмөт башчысынын милдетин аткаруучу Пхумтам Вечаячай эки өлкө ортосундагы жаңжалды жөнгө салуу үчүн жолугушуу өткөрүүгө даяр экендиктерин билдиришти. Бул тууралуу АКШнын президенти Дональд Трамп Truth социалдык тармагындагы баракчасы аркылуу маалымдады.

"Алар дароо жолугуп, ок атышууну токтотууга жана акыры тынчтыкка келүүгө макул болушту", - деп жазган ал премьер-министрлер менен болгон телефон аркылуу сүйлөшүүсүнөн кийин.

Буга чейин Малайзиянын премьер-министри Анвар Ибрагим Таиланд менен Камбоджа чек арада ок атышууну токтотууга макул болушкандарын билдирген. Бирок чет элдик басылмалардын маалыматтарына караганда, тараптар бири-бирине сокку уруулары уланган.

Эске салсак, бейшембиге караган түнү Таиланд менен Камбоджанын чек арасында кагылышуу башталган. Таиландда Камбоджа менен чек арадагы куралдуу кагылышууларда кеминде 14 тургун жана 1 аскер каза болгону кабарланган. Ал эми Камбоджада 8 тургун, 5 жоокер каза болгону айтылган.