Кыргыз балбаны Дүйнө биринчилигинде коло медаль тагынды

Кыргыз балбаны Нурислам Өскөнбаев Грециянын Афина шаарында өтүп жаткан 17 жашка чейинкилер арасындагы грек-рим күрөшү боюнча Дүйнө биринчилигинде коло медаль тагынды. Бул тууралуу Дене тарбия жана спорт мамлекеттик агенттиги билдирди.

Маалымдагандай, ал 80 килограмм салмак чен бирдигинде күч сынашкан. Алгачкы беттешинде италиялык Коан Валентинини 10:0 эсебинде, 1/8 финалдык айлампада америкалык Адан Фернандести 5:1 эсебинде, чейрек финалда венгриялык Доминик Кертешти 4:0 эсебинде жеңип алган.

Ал эми жарым финалда өзбекстандык Абдулазиз Холмирзаевге утулуп калган. Коло үчүн болгон таймашта Нурислам ирандык Таха Жавид Ноурини 3:1 эсебинде артта калтырган.

Муну менен Нурислам кадеттер арасындагы грек-рим күрөшү боюнча Дүйнө чемпиондугунда коло медаль уткан алтынчы кыргызстандык болуп калды.