Мальта сентябрда Палестина мамлекетин расмий тааныйт

Мальтанын премьер-министри Роберт Абела, өлкөсү 2025-жылдын сентябрь айында Бириккен улуттар уюмунун Башкы ассамблеясы учурунда Палестина мамлекетин расмий түрдө тааный турганын жарыялады. Бул билдирүү Улуу Британиянын премьер-министри Кир Стармердин билдирүүсүнөн бир нече сааттан кийин жана Франциянын Палестинаны таануу боюнча пландары жарыялангандан кийин жасалды.

"Бул позициябыз - Жакынкы Чыгыштагы туруктуу тынчтыкка жетүү боюнча аракеттерге болгон берилгендигибизди чагылдырат",- деп жазды премьер-министр Абела өзүнүн социалдык тармактагы баракчасына.

Мальта өкмөтү буга чейин май айында, Палестинаны таануу ниетин билдирип, бул чечим БУУнун июнь айындагы жыйынында кабыл алынат деп жарыялаган. Бирок бул конференция кийинкиге жылдырылган болчу.

Өлкө Палестина маселесин көптөн бери колдоп жана эки мамлекеттүү чечимди жактап келет. Июлдун ортосунда, мальталык оңчул оппозиция да өкмөттү Палестинаны дароо таанууга чакырган.

Белгилей кетсек, быйыл май айында Исландия, Норвегия жана Испания да Палестинаны эгемендүү мамлекет катары тааныган.