Марокко палестиналыктарга 180 тонна жардам жөнөтөт

Марокко падышалыгы Палестина элине 180 тонна медициналык жана гуманитардык жардам жөнөтөт. Бул тууралуу кечээ, 30-июлда Maghreb Arabe Presse агенттиги билдирди.

"Падыша Мохаммед VI Палестина элине, айрыкча Газа секторундагы калкка өзгөчө гуманитардык жана медициналык жардам жөнөтүү боюнча буйрук берди",- деп айтылат билдирүүдө.

Анда белгиленгендей, гуманитардык жардамдын көлөмү 180 тоннаны түзөт. Анын курамына негизги азык-түлүк, сүт жана балдарга арналган товарлар, дары-дармектер жана хирургиялык жабдуулар, ошондой эле жууркандар жана ылайыктуу чатырлар кирет. Жардам атайын уюштурулган маршрут аркылуу жеткирилет, бул палестиналыктарга тез жана түз жетүүсүн камсыз кылат.

Газа секторунун Саламаттык сактоо министрлиги 30-июлда билдиргендей, блокададан улам ачарчылыктан каза болгондордун саны 154 адамга жетти, алардын арасында 89 бала бар. Израилдин кол салуусунан бери каза болгондордун жалпы саны 60 138 адамга жетти, 146 269 адам жаракат алды.