U-17: Кыргызстандык балбандар грек-рим күрөшү боюнча 4 медалга ээ болушту

Кыргызстандык балбандар Грецияда өткөн грек-рим күрөшү боюнча жаштар арасындагы дүйнө биринчилигинде 4 медаль жеңип алышты.

Турнир 28-30-июль күндөрү Афина шаарында өтүп, анда 17 жашка чейинки спортчулар күч сынашты. Жалпы 10 салмак категориясында медалдар ойнотулуп, Кыргызстандан 9 спортчу катышты.

Алардын арасынан Алхам Абдирасулов 55 килограмм салмак категориясында 1-орунга ээ болуп, Дүйнө чемпиону аталды. Беттеште Абдирасулов Иран, Венгрия, Кытай, Индия жана Казакстандан келген балбандарды жеңди.

Ал эми Нуркерим Кумарбеков 45 килограмм салмак ченинде килем үстүнө чыкса, Амангелди Ысакбаев 60 килограмм салмак ченинде оюн көрсөттү. Эки балбан тең финалга чыгып, күмүш медалдын ээлери болушту.

Нурислам Өскөнбаев болсо 80 килограмм салмак категориясында 3-орунду багындырды. 51 килограмм салмак менен килемге чыккан балбан Ислам Курбанов коло үчүн күрөштө жеңилип, 5-орунду алды.

Командалык эсепте Кыргызстандын курамасы 100 упай топтоп, 44 өлкөнүн ичинен 4-орунду ээледи.