Эттин баасына мамлекеттик көзөмөлдөө киргизилет

Эттин баасына мамлекеттик көзөмөлдөө киргизилет. Бул тууралуу бүгүн, 30-июлда Суу ресурстары, айыл чарба жана кайра иштетүү министрлигинен билдиришти.

Мындай чечим аталган мекеменин башчысы Бакыт Төрөбаевдин төрагалыгы алдында өткөн жыйында кабыл алынды.

Мамлекеттик көзөмөлдөөнүн максаты - эттин баасынын өсүшүнө жол бербөө, малдын чек арадан кирип-чыгышын көзөмөлдөө, малды экспорттоого сандык чектөө киргизүү экени кошумчаланды.

Жыйындын жүрүшүндө өлкө аймагында эттин баасына үзгүлтүксүз мониторинг жана анализ жүргүзүп туруу Экономика жана коммерция министрлигине караштуу Монополияга каршы жөнгө салуу кызматына жүктөлүп, министрликке караштуу Ветеринария, мал чарбасын өнүктүрүү, жайыт жана тоют кызматына мал ташуучу жеке ишкерлердин ветеринардык-санитардык көзөмөлүн күчөтүү, Чек ара кызматы менен биргелекте аткезчилик менен күрөшүү боюнча конкреттүү тапшырмалар коюлду.