Куруучулар күнү үчүн форум: сыйлыктар, меморандумдар жана тармактын келечеги тууралуу диалог

Бүгүн, 31-июлда Бишкек шаарында Куруучулардын күнүнө карата арналган салтанаттуу иш-чара болуп өттү. Иш-чараны Кыргыз Республикасынын Куруучулар союзу уюштурду.

Форумдун ачылышында Куруучулар союзунун башкармалыгынын төрагасы Чолпонбек Курманбекович Акматов куттуктоо сөз сүйлөп, катышуучуларды кесиптик майрамы менен куттуктап, куруучулардын өлкөнүн өнүгүшүндөгү ролуна токтолду.

Форумда курулуш тармагындагы бир катар компаниялар жана алардын жетекчилери тармактын өнүгүшүнө кошкон салымы үчүн грамота жана ыраазычылык каттар менен сыйланышты.

Ошондой эле форумдун алкагында И.Раззаков атындагы Кыргыз мамлекеттик техникалык университети, Куруучулар союзу, Архитекторлор союзу жана Эл аралык кыймылсыз мүлк ассоциациясы менен өз-өзүнчө кызматташтык жөнүндө меморандумдарга кол коюлду. Бул документтер кадрларды даярдоодо, тажрыйба алмашууда жана тармакты модернизациялоодо биргелешкен аракеттерге багытталган.

Форумдун соңунда союздун төрагасы курулуш тармагынын азыркы абалы боюнча бир катар суроолорго жооп берди. Көйгөйлөр тууралуу сөз кылып жатып, Чолпонбек Акматов мындай деди:

«Биздин башкы көйгөйлөрдүн бири — бул узак мөөнөттүү финансылык каражаттардын тартыштыгы. Анткени дольщиктер көбүнчө 5–7 жылдык мөөнөткө бөлүп төлөө мүмкүнчүлүгүн сурашат, ошол эле маалда курулуш 2–3 жылда бүтөт. Бул долбоорлорду кымбаттатат. Мындан сырткары, жер тилкелеринин жана курулуш материалдарынын баасы өсүп жатат, квалификациялуу кадрлар жетишсиз. Мына ошондуктан бүгүн университет менен меморандумга кол коюлду. Мында студенттерди биринчи курстан баштап эле тарбиялоону максат кылуудабыз».

Ошондой эле ал курулуш тармагында санарип технологиялар жана жасалма интеллект элементтери барган сайын колдонулуп жатканын белгиледи.

Анын айтымында, Кыргызстан бул багыттагы дүйнөлүк тенденцияларды байкап, Өзбекстан, Казакстан жана Россия менен кызматташтык аркылуу эл аралык тажрыйбаны өздөштүрүүгө тийиш.

Мындан тышкары, быйылкы жылдан тарта 2-август Кыргыз Республикасынын Куруучулардын күнү катары расмий бекитилди. Бул кесиптин коомдогу ордун белгилөө жана тарыхый салттарды улантуу үчүн маанилүү кадам болду.