АКШ Украина жана башка өлкөлөр үчүн AMRAAM ракеталарын сатып алууга 3,5 миллиард доллар бөлөт

АКШ Украина жана башка өлкөлөр үчүн AMRAAM тибиндеги ракеталарды сатып алууга 3,5 миллиард доллар бөлөт. Бул тууралуу Пентагон 31-июлда өзүнүн расмий сайтында билдиргенин чет элдик басылмалар жазышууда.

"Raytheon" компаниясы менен (Аризона штаты) орто аралыктагы AMRAAM ракеталарын чыгарууга 3,5 миллиард долларлык баа менен чектелбеген контракт түзүлдү",- деп айтылат билдирүүдө.

Украинадан тышкары келишим Данияга, Германияга, Польшага, Улуу Британияга, Израилге жана башка өлкөлөргө аскердик жеткирүүлөрдү да камтыйт. Ал 2031-жылдын үчүнчү чейрегине чейин аткарылып бүтүшү күтүлүүдө.

Ошондой эле, 30-июлда америкалык саясат таануучу Жон Миршаймер АКШ президенти Дональд Трамп Киевге курал-жарак жеткирүүнү улантууну каалабай жатканын жана Украина жеңилип калышы мүмкүн экенин билдирген. Ал АКШнын экономикасы бир жагынан Европанын эсебинен пайда көрүп жатканын белгилеген.